按盤價 
《小傳日記》時隔差唔多三年，魚缸嘅「茶飲第二股」茶百道（０２５５５）終於今日隆重
敲鑼，但上市即破發，九點半一開陰燭直落，全日最低見過１０﹒８銀，比起招股價１７﹒５銀
大跌三成八，以新股表現來講認真極度差劣，收報１２﹒８銀，跌兩成七。
魚缸今日大反彈，之前最殘嘅內需股今日都放量回升，但係茶百道身為內需零售嘅一份子，
偏偏逆市捱沽。其實噚日暗盤普遍都要跌夠一成收盤，都知呢杯茶嗒唔過，今朝公布招結果無超
額認購不特止，仲要公開發售只係認購得五成，仲有一半去唔到貨，反映孖屐見到奈雪
（０２１５０）咁嘅賤價，明顯係對茶飲股有巨大戒心。對於茶百道慘不忍睹嘅上市表現，有媒
體引述有ｉｂａｎｋｅｒ更加直言「Ｉ ａｍ ｓｐｅｅｃｈｌｅｓｓ」。
事實上，一早都預咗茶百道招股反應唔會太好，但係認購率五成兼破發跌三成都係比預期更
差。茶百道差成咁，主因就係高不成低不就嘅問題。茶飲市場喺一、二線城市飽和，間間茶檔急
上市就係為咗拓展下沉城市，但大家都知茶飲下沉之王固然就係蜜雪冰城，截至２０２３年底三
線或以下城市嘅門市佔比係５６﹒９％，而茶百度就只得４１﹒６％。而上層市場當然就係奈雪
嘅天下，一線至新一線城市嘅門市佔比奈雪有６７﹒８％，茶百道只有３７﹒５％。結果茶百道
就成為唔貴又唔平嘅存在。
唔平又唔貴嘅背後，其實就係特色欠奉嘅問題。蜜雪冰城贏在夠平，「平」就成為蜜雪最大
特色；奈雪係全場最貴，兼要打造「第三空間」，「高級同大」就成為佢嘅特色；但相對地茶百
道就未係好見到佢嘅特色。其實茶百道喺成都起家，而ｌｏｇｏ隻熊貓就正好代表佢呢一個身份
。有講成都「無茶不成都」，成都嘅茶館數目冠絕全國，茶百道作為「傳統茶飲之都」孕育出嚟
嘅「新興茶飲公司」，其實好應該把握呢個獨特身份去發展自己嘅特色。如今間間都忙著打下沉
市場，其實更應該係強調返自己特色，咁先可以成為業界入面無可取代嘅存在，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
etnet榮獲HKEX Awards 2023 「最佳表現證券數據供應商」大獎► 了解詳情
