港股奇觀就日日新鮮日日奇怪,例如你改個名,就好似去到一個「新高度」咁款,博客都好少留意創仔股份,不過今日隻米蟲元宇宙(08645)就突然爆升一倍幾,仲有五百幾萬成交,就十分有趣啦。
公司早幾日曾經停牌,之後公布折讓配股,公司擬配售最多1.20億股,佔經擴大的公司已發行股本約16.67%。每股配售股份0.218港元的配售價較3月22日收市價每股0.27港元折讓約19.26%。
博客搵多少少新聞,公司主業係做互聯網管理服務,包括網絡支援服務及網絡連接服務,不過旗下有間Bitcoin World Technology Limited(Bitcoin World Technology),仲話正在準備就必要牌照(牌照)向證監會提交相關申請,以在香港進行證券及期貨條例項下第1類(證券交易)及第7類(提供自動化交易服務)受規管活動,如果拎到牌就可以建立虛擬資產平台業務並提供託管服務。
不過最有趣係,公司即將改名叫「比特元宇宙」,比特幣我都理解,同元宇宙有咩關係?會唔會因為咁引起股價波動,真係無從估計。博客唔係建議你入手呢隻,不過你要買我都阻唔到你,幾難得見到創仔有成交,下話?
《編者按》本欄搜羅即市傳聞,惟消息未經證實,《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情