RSS訂閱 香港魚缸同內地魚缸最唔同嘅地方其中之一係，股價無升跌停機制。所以，啲股票，特別係細價股，鍾意升幾多就升幾多，鍾意跌幾多就跌幾多，完全無王管。
話說今日魚缸都出左一隻倍升股，執筆時卓航控股(01865)做緊0.046蚊，即係4仙6。博客一時眼花，差啲以為係做化妝品零售果間。股價今日爆升一倍，仲要無任何公布，例如涉及收購、私有化或發盈喜之類嘅利好消息，唔係一般上市股份可以做得到。
翻查卓航嘅過去，雖然上市短短5年，但原來呢啲大升大跌嘅場面一早已經見慣不怪。2022年4月27日，卓航股價大跌90%。4月28日股價反彈72%，然後4月29日再升61%。之後喺2023年9月13日，股價又大跌80%。只可惜，呢次大跌之後，並無好似2022年咁大反彈。
卓航控股係新加坡管道建設同相關工程服務嘅總承辦商，客戶主要包括私營燃氣、水務、電訊、供電公司。公司喺2019年上市，上市價5毫半子。因為主力做管道工程，所以上市時，公司名叫管道工程，俾人一種踏踏實實嘅感覺。一聼個名，就知道佢哋做乜嘢生意。2021年6月公司將「管道工程」更改為「卓航控股」。就咁聼個名，博客除咗第一眼睇錯，以為係賣化妝品零售果間之外，真係想像唔到佢地靠咩揾食。
睇返卓航過去5年嘅股價走勢，最風光時刻係2020年9月17日，股價最高去到1.83蚊，之後走勢向下。近期一直挨住低位2仙幾。今日大升，有錢賺嘅話，俾博客一定食胡先，呢種千載難逢嘅機會真係可一不可再。不過，又有幾多人係低位揸貨？如果手頭無貨嘅，博客真係唔敢建議買，博客唔係「搏客」，唔會揾命搏。
《編者按》本欄搜羅即市傳聞，惟消息未經證實，《經濟通》亦不保證內容之準確性。
《說說心理話》與你分享被性騷擾解決辦法，大量真實個案，唔同場所如何提防及應對？► 即睇
