按盤價 
《小傳日記》港股終於當旺，以為升過牛熊線有阻力，點知經聯儲局放一放鴿，恒指又有得
升，今日仲係收市企得穩１８０００，仲因為勞動節假避開咗議息結果前美股急瀉嗰吓，呢個假
又真係放得合時！
市好乜都識升，連高危板塊內房都升到撼撼聲，好似乜嘢債務問題都是「浮雲」一樣。近期
內房焦點都係喺「半國企」萬科（０２２０２）身上，雖然有「半國企」身份，但都係難逃樓市
低迷嘅慘況。萬科公布上一季要蝕３﹒６億人仔，上年同期仲有得賺１４億人仔，睇怕萬科嘅陣
痛啱啱先開始。
針對繼續慘烈嘅季績，主席郁亮喺股東大會上都認如今股價表現的確係唔符合目標，離自己
要求都仲有好遠距離，所以就算被人鬧都會企定。為此，郁亮都有出口術氹吓小股東，提到而家
正係研究緊管理團增持計劃，所以今日股價都叫升返些少，重上５銀水平。
股東大會上郁亮提出咗「一二三計劃」，包括「一攬子方案」、「兩個階段」以及「三個目
的」；提出嘅「一攬子方案」入面有「兩個階段」，先要「降解風險」，繼而「做精業務」；希
望咁樣可以達致「三個目的」，分別係「降負債」、「融資模式轉型」同「聚焦主業」。「聚焦
主業」呢一部分郁亮就解釋，未來集團業務會瘦身，集中做三大業務，即係綜合住區開發、物業
服務同公寓租賃，而其他業務就會狠心分手。
講就講得幾好聽，而且每個步驟清清楚楚，如果錢真係好似預期咁來，就應該會有用。但最
新聯儲局風向雖然偏鴿，但對減息時間表依然曖昧，甚至已經由於之前預期６月開始減，延後預
期９月先開始減。神州同胞都唔係唔識睇市，一定要等到減息真係開始先會入市，如今減息又再
延後，恐怕要神州樓市活躍到以前咁樣都仲有排。萬科有國企背景，揸著一手好牌，應該要係內
房入面最快翻身嗰隻，就睇佢點捱過未來一段艱難嘅時間，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
《說說心理話》與你分享被性騷擾解決辦法，大量真實個案，唔同場所如何提防及應對？► 即睇
